雖然Ａ仔終於成功入摩，但香江魚缸今日（２２日）繼續無厘神氣；恒指朝早低開９７點後，一班中字輩發力撐起，大市一度拗腰彈起１７３點至２５８６７。正當以為入摩效應浮現之際，Ａ場就因為債市動盪嚇親，最終調頭收跌０﹒３巴仙，搞到香江呢邊跟住一齊跳水。
　　本來升得好地地嘅內銀內險都縮晒水，恒指最後收跌２０點報２５６７４，連跌３日，唔單止十天線同廿天線都得而復失，就連「死亡交叉」都出現埋！Ｔｏｏ　ｂａｄ　ｌａ！國指有中資金融股撐住，都只能象徵式踢起９點收報１０４０２。
　　魚缸突然受祖國債市動盪拖累，缸友都唔敢貿然出手，離場坐定定好過，成交錄得近７８１億銀。
　
＊升得好地地忽然刮陣風，內銀與內險尤幸仍輕鬆＊
　
　　Ａ場成功入摩之後，一眾神州金融佬生氣勃勃，錢莊招行（０３９６８）獲星展唯高達重申「買貨」評級，應聲彈高近４巴仙，報２２﹒９５銀，仲一度創近兩年高２３﹒６銀。建行
（００９３９）同重慶銀行（０１９６３）末期息今日除淨，分別跳高唔夠半同近２巴仙，收
６﹒１２同６﹒１７銀。
　　內險都唔輸蝕，阿爺話會由３個層面幫助發展商業養老保險，太保（０２６０１）同國壽
（０２６２８）衝前近２巴仙，報２９﹒８５同２４﹒２５銀。平保（０２３１８）跟住行前半巴仙，埋單５２﹒２５銀。
　
＊大摩升目標恒安認真俏，復星債被拋股價唔識笑＊
　
　　恒安（０１０４４）獲大摩維持目標價７５銀，今日急速踢起逾４巴仙，報６０﹒７５銀，升破百天線，成為表現第二好藍戰士。
　　金融孖屐環環相扣，債市隨時都牽連到股市；話說復星（００６５６）２０２２年到期嘅美元債突然唔見２巴仙，創史上最大跌幅，拖累復星股價隨即出現閃崩，下午突然唔見近一成，埋單無咗近６巴仙，報１１﹒７４銀。同系復星醫藥（０２１９６）最多唔見近８巴仙，埋單跌低近６巴仙，報２９﹒４銀。原來有報道指，阿爺就要求各家銀行查復星、海航集團、萬達等「海外併購明星民企」嘅授信風險分析，難怪連海航實業（００５２１）都碌低６巴仙喇！
　　沽空機構烽火研究今次新目標係中國家居（００６９２），報告以「一個徹底嘅騙局」做題
，仲話中國家居最終會被除牌。不過，公司開市前就停咗賽，話將會發聲明作澄清。缸友又可以食花生睇大戰喇！
　
＊烽火來狙擊６９２停牌，德銀畀個讚電股心情ｈｉｇｈ＊
　
　　阿爺上調上網電價，德銀讚有正面驚喜。潤電（００８３６）即刻飛升近５巴仙，最新報
１５﹒２６銀，係今日表現最好藍籌；同業華能國際（００９０２）都升逾１巴仙埋單５﹒４８銀；華電國際（０１０７１）裂口高開最高上到３﹒７８銀，全日升近２巴仙，收３﹒５８銀。
　　消息亦都帶動中國燃氣（００３８４）跳上１４﹒２銀創兩年新高，加上中燃氣全年盈利大增逾八成獲大行唱好，全日埋單開心跳起逾９巴仙，以全日最高位收市，勁！街坊新奧
（０２６８８）最高見４４﹒８５，埋單就得番逾２巴仙落袋，收報４３﹒５５銀。
　
＊燃氣有苗頭車仔收收油，上電Ａ停賽Ｈ股高高收＊
　
　　德銀話雖然上半年砵砵車表現強勁，但行業數據未有跟上步伐，東風（００４８９）都被降評級至「持有」，連日有微微升幅之後今日即跌近３巴仙，埋單跌番落９﹒７３銀，成為表現最差國指成分股。長汽（０２３３３）全日挫近２巴仙，畀德銀降評級至「沽盤」同調低目標價至８﹒３５銀，今日低見９﹒８４銀，埋單９﹒９２銀。
　　上海電氣（０２７２７）（滬：６０１７２７）畀中證監審核公司交易，Ａ仔今日起停牌，但香江呢邊竟然落鑊，最高上到４﹒０８銀，創近三個月新高，全日仲升近５巴仙，以３﹒８５銀埋單。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇