依家好多國家都逐步開關，傳聞內地都考慮明年3月復常。內需股早排都炒過一輪，但唔係李寧(02331)就係安踏(02020)，李寧由11月1號低位39.75銀，升到今日最高52.95銀，累積升超過33%；同期安踏則由最低67.85銀升到今日最高81.3銀，累積升幅接近20%。
　　不過，炒親內需好似淨係體品升晒，但其實只係佔衣、食、行其中一范。套用番香港人經歷完疫情嚴峻期間嘅防疫措施，一解封，啲人會做咩？就係去番啲之前經常幫襯嘅餐廳食番餐。雖然我唔知內地係咪都係咁，但睇呷哺呷哺(00520)股價表現都幾似。
　　喺內地主要經營火鍋生意嘅呷哺呷哺，今日盤中最高升到5.75銀，今日正好立冬，「火鍋」股有噱頭。此外，呷哺呷哺通常都係下半年收入較佳，雖然過去三次公布嘅業績都係虧損，惟非戰之罪，而且集團照派中期同末期息，算有誠意啦！當然，息率唔方高，現時計周息率只得1厘。不過，股價今日都升成4.5%，最高價5.75銀亦創咗今年2月18日以嚟最高，唯一驚佢同9月份高位5.67銀造咗雙頂，上周五以大陽燭大成交突破5銀阻力，可以等股價回調到5至4.8銀買入，收低過4.5銀止蝕，目標睇6.5銀，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇