今日魚缸繼續死氣沉沉，成交額1000億都唔到，仲要一度跌超過300點，再次遠離兩萬大關。不過今日隻BYD(01211)就好醒神，一來電車大佬Tesla終於知衰著量加返價，二來可能就同特首超哥上去參觀過有關！
　　啱啱星期六超哥遊學團嘅第二日就去到深圳參觀BYD總部，其間就同議員團友一齊試坐咗BYD「雲巴」5分鐘，又參觀咗BYD嘅「刀片電池」刺穿實驗。「雲巴」係BYD旗下嘅輕軌列車，超哥坐完雲巴之後，就喺微博到提到會研究吓，隨後BYD方面都證實有意喺香江推出雲巴等等嘅新能源交通體系。
　　政府一直都吹風會喺啟德造輕軌系統，行勻全個啟德，來往觀塘、九龍灣以至黃大仙區。睇落就幾夾啟德一個智慧、環保社區嘅規劃，不過人所共知觀塘塞車塞到要問候阿媽，有專家就講過，如果再夾硬放輕軌系統落去，可能會塞上加塞。
　　其實輕軌對於建設環保社區嚟講的確係好事，環保得嚟又方便，不過以觀塘咁老舊嘅交通狀況，夾硬放落去都好有可能會吃不消。但例如有啲議員團友提到，可以將佢安排落去北部都會區，如果係一個全新社區咁發展，咁就理所當然得多，好似當年輕鐵都係咁樣落戶屯元天一樣。
　　BYD老闆王傳福就提過，治理交通擁堵問題，「雲軌」與「雲巴」係最佳選擇，並認為喺城市軌道交通領域，可再造一個BYD。如果BYD真係唔只有為香江帶來一架新嘅電動車，更加係多一條交通系統，咁就有更大嘅貢獻，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇