近排百度（09888）真係新聞一堆堆，百度雲被官方約去「吹水」，而股價又不斷向下「潛水」，博客成日都覺得有危就有機，皆因科技股股價跌到殘，總之破底就溝肯定無死。
　　最近公司又有人士調動，遊戲部門有指裁三百幾人走，然後直播業務都炒逾九成人，其他教育業務都要裁員，甚至有員工指呢次裁員係自2018年以來從未見過嘅大規模裁員，而有傳百度副總裁曹曉東都要從百度調任，真係慘慘豬囉。
　　裁員調任，係股票界好似都係一種好消息，因為意味公司整合資源，又或者派個新人落場，自然就新人事新作風，對股價有一種憧憬作用。不過百度係過去一直被人咎病，因為佢好似想模仿騰訊嘅模式，開展多元化業務，不過好似張張刀就無把用到，呢頭搞遊戲直播，個頭就搞電動車，最後都係要裁員。
　　不過都好嘅，整合公司算係有個新開始，不過員工就慘小小啦，臨近年尾先被人請食「無情雞」，真係欲哭無淚囉。不過作為投資者，百度目前都尚算低水，同歷史低位133蚊亦差唔到幾遠。
　　所以博客認為，元旦前後分段吸納百度都係一個幾唔錯選擇，目前可以先入一注，跌穿135蚊再入，如果再創歷史新低可以再溝。畢竟公司大搞電動車相關業務，仍然係國策之內，大有作為，目標價可以先睇150蚊，到時可以先放一半，留一半等佢起飛啦。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【免費講座】陸叔《2024 投資心法·養生之道》講座► ►火速報名