今日博客同大家睇下澳博(00880)。集團宣布建議每4股供1股方式，集資約30.31億銀，每股供股價2.08銀，比噚日收市價3.14銀折讓約33.8%。
　　詳細情況是咁的，澳博控股股東澳娛作不可撤回承諾，按約54.7%股權比例悉數承購應佔供股股份，並且申請認購額外約3.22億股供股股份，另外同包銷商法國巴黎證券(亞洲)訂包銷協議，以包銷最多約3.59億股供股股份。若果其他股東唔供股，澳娛持股或升至59.2%。
　　澳博本身股價已經低，今次集團仲喺呢個時候配股籌期，嚇到班缸友走晒。今日澳博低開11%，早段跌幅一度擴大到13%，今年3銀嘅重要支持位一嘢就隊穿咗，暫時低位2.6銀創超過10年新低。事實上，澳博股價由舊年3月高位11.48銀一直跌跌跌，今日暫時低位2.6銀，累積已經跌咗77%，即係由舊年開始揸住澳博，就蝕到依家，走勢遠比同行的銀娛(00027)弱，而澳博債務資產比率超過四成，股價長期弱勢都唔係無原因。
　　馬交連續第11日社區零感染，當局亦宣布終止即時預防狀態，另外會同珠海恢復免隔離通關，相信對賭股嚟講係喜訊。只不過，澳博基本面唔靚，股價又keep住弱，博客實在唔建議大家撈底。至於銀娛唔係唔買得，但喺48銀左右開始有啲阻力，再下一重阻力講緊49銀。即使依家10天線升緊，但現價短炒值博率麻麻哋，大家可以等股價落番44銀附近先買入。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】政府宣布垃圾徵費暫緩，未來將繼續推廣回收及減廢，你認為幾時先係垃圾徵費嘅時機？► 立即投票