美國CPI升幅按年無市場預期咁多之餘，更加係今年以嚟最慢增速，核心CPI按年增幅亦由9月6.6%嘅40年高位回落到6.3%，市場重拾久違嘅興奮，道指噚晚大升超過1200點。今日魚缸都高開過千點，但暫時升到50天線附近有啲阻力，睇下今日可唔可以有Happy Friday喇！
　　今日文進同大家講下蔚來(09866)，今朝股價曾經升超過15%，跟住魚缸齊興奮！不過，各位興奮嘅同時，都唔好忘記蔚來仲係蝕緊錢㗎！公司上日公布第三季業績，淨虧損擴大到41.4億人民幣，舊年同期虧損係28.6億人民幣，每股普通股/美國存託股份淨虧損為2.53銀！雖然第三季嘅收入按年升33%到130.02億人民幣，汽車交付量亦上升，但虧損依然唔細，仲未去到扭虧為盈嘅階段。
　　文進之前講汽車股都提過，芯片供應唔夠同鋰價飆升幾影響汽車股嘅前景，而呢兩個大浪未見減退，尤其碳酸鋰電池價格keep住升，作為造車新勢力嘅蔚來好難避得開。本身仲係蝕緊錢，生產成本可能繼續增加，文進覺得今日蔚來跟住魚缸彈起，大家應該把握呢個「逃生門」呀！
　　睇番日線圖，蔚來由9月高位175銀跌落嚟，喺70銀邊緣有啲支持，11月7日曾經升破20天線，但好快又跌番落去。今朝雖然裂口高開，但仲夾住喺10天線同20天線之間，走勢上未有大幅好轉，短期要升番上90銀樓上，除咗要再有利好消息，成交額亦要提高，今日趁佢反彈應該走一走先！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【免費講座】陸叔《2024 投資心法·養生之道》講座► ►火速報名