京東(09618)上星期五(18日)派咗第三季嘅成績表，上年同期虧損28.07億人仔，今年第三季就賺59.63億人仔，好過市場預期嘅賺48.57億人仔。如果攞非公認會計準則去睇，第三季淨利潤按年升98.89%到100.4億人仔。
　　再細睇收入按年升11.35%，當中商品收入按年升5.92%，服務收入按年升42.23%。另外，　年度活躍用戶數由截至舊年9月30日為止12個月嘅5.522億，增加6.5%，到截至今年9月30日為止12個月嘅5.883億。雖然京東可以扭虧為盈，但收入同活躍用戶數嘅增長都唔係太多。
　　京東今日股價走勢似乎無因為呢份成績表而造好，早段曾經跌超過5%。事實上，富瑞、麥格理、高盛等大行都喺京東公布季績之後調低目標價，富瑞嘅降幅更係超過10%，由448銀降到402銀，相信市場對於京東第三季業績唔太收貨。
　　今日京東暫時失守100天線，嚟緊10天線同50天線守唔守得住會非常關鍵，因為再數下一個防守位估計係20天線(依家係176.7銀)，有貨嘅朋友應該要睇條10天線，收市跌穿咗要離場呀！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》與你分享被性騷擾解決辦法，大量真實個案，唔同場所如何提防及應對？► 即睇