京東(09618)同京東物流(02618)放完榜之後，就輪到京東健康(06618)喇。公司第三季經營盈利7722.5萬元人民幣，同舊年同期蝕5.56億元人民幣相比，情況改善唔少，而經調整經營盈利按年升87%，到6.55億元人民幣。另外，京東健康第三季收入按年升42.1%，到105.2億元人民幣，整體表現唔錯啵。
　　大行高盛發表研究報告，指京東健康第三季數據或高過該行對今年下半年嘅預期，認為有關數據正面，並且留意到投資者關注線上藥品銷售監管全面實施之後，對公司現有商品交易總額(GMV)同增長速度嘅潛在影響，予「買入」評級。
　　雖然今日京東健康微微低開，但之後可以重拾升勢。睇番日線圖，京東健康上日雖然報跌，但仲頂得住喺10天線，走勢幾硬淨。不過，文進覺得依家唔係最佳嘅買入時機，因為股價前幾日喺70銀水平有阻力，過去喺呢個位置都有幾大阻力，現價買入值博率唔太高，可以等佢回番落去55銀買入。

《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇