早幾年股價唔係好移動嘅中移動(00941)，今年為止升勢強勁。集團上日公布舊年全年業績，純利1254.59億人仔，按年升8.02%，表現中規中矩喇。派末期息2.21銀，連埋中期息2.2銀，全年股價合計每股4.41銀，按年增長8.6%，對於收息一族嚟講，係天大嘅喜訊呀。
　　有啲大行對呢份成績表反應正面。花旗認為，中移動潛在嘅5G市場領導地位、數字化轉型帶動收入增長前景好轉，加埋7.7厘股息非常吸引，維持「買入」評級，目標價由65.31銀大幅調高約24%到81銀，更重申中移動H股係內地電訊板塊嘅首選。另外，摩通睇好中移動財務狀態強勁，淨現金超過市值嘅20%，行業防守性同流動性都比較強，維持「增持」評級，目標價70銀。
　　中移動現金流勁，股息吸引就出晒名喇，加埋政策憧憬下，股價成支火箭咁升上去。不過，集團舊年年度嘅純利未有好大驚喜，加上早排政策憧憬已經炒得八八九九，短期要啲時間消化下升幅。今個星期一(20日)升到66.1銀後急速回落，之後一直上唔番去，今朝更加試穿20天線，未有貨嘅朋友可以等多陣先部署，回到50天線附近吸納，中長線目標90銀，54銀守唔住就止蝕離場。

《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情