01/06/2023 11:52

《魚缸博客》京東618購物節報捷,短線尚有反彈空間?

  京東(09618)今年嘅618購物節開波喇,美的、海爾、小米(01810)、格力、蘋果等品牌銷售額瞬間破億,10分鐘銷售額破億嘅品牌數量按年增加23%,超過6成新商家5分鐘成交額突破5月日均全日成交額。另外,近5成中小商家成交額增長超過2倍,3C、汽車等成為銷售極佳嘅熱門品類。
  618購物節期間,3C數碼品類依然表現強勁。開波10分鐘內,蘋果品牌成交額1秒破億,小米、榮耀、OPPO、vivo、華為、三星等手機,加埋MiniLED同OLED顯示器、微單相機成交額按年增長都超過1倍;客制化鍵盤成交額按年增長超過10倍;大功率移動電源、桌面音箱、無人機成交額按年增長超過1.5倍;電子教育品類成交額按年增長1.2倍,學而思、小猿、作業幫等新晉品牌表現相當好。
  京東又提到,喺京東雲「言犀」多模態人機交互技術支撐下,言犀虛擬主播應用全面升級,喺今年618前上線咗32款2D真人孿生新主播,同時超過100位數字人主播全天候online,滿足全品類、多場景商家直播需求。618開啟後10分鐘內,言犀虛擬主播開播商家比舊年雙11增幅近4倍。
  有618嘅消息沖下喜,加埋美國眾議院通過債限法案,科技股暫時鬆一口氣。京東今日高開1.91%,之後升幅曾經擴大至4%,總算有啲反彈。不過,股價由今年年初開始不斷下跌,跌穿晒過去嘅支持位,短線要火箭式上升就有啲難度嘅,好大機會喺150銀出現阻力,有貨嘅朋友應該趁反彈盡快離場喇。
 
《編者按》本欄搜羅即市傳聞,惟消息未經證實,《經濟通》亦不保證內容之準確性。

【你點睇】京港滬港高鐵動臥首發運行,「夕發朝至」模式讓車程縮短近半,你會否考慮乘搭?► 立即投票

人氣評論
即時報價
全文搜索
Search
最近搜看
貨幣攻略
大國博弈
More
Share