近日汽車股走勢唔錯，「造車新勢力」蔚來(09866)、小鵬(09868)同理想(02015)升幅顯著。
　　汽車股突然間氣勢咁好，相信同政策因素有關。自今年以嚟，內地多個地方紛紛出台汽車消費激勵措施，包括會由今日開始，深圳市福田區對個人消費者購買新車最高補貼15000人仔，活動購車補貼總額為3000萬人仔。
　　有報道指出，福田今年以嚟實施嘅汽車消費補貼力度大，推動汽車消費持續上升。到目前為止，福田今年已經舉辦咗兩輪購車補貼活動，補貼總額共計8000萬人仔。
　　各種刺激汽車消費嘅政策出台，加上對未來更多經濟復甦政策嘅憧憬，小鵬持續獲資金流入，炒高咗唔少。由6月1日低位30.3銀至噚日(6月15日)高位43.6銀計，累積超過43%嘅升幅。今朝股價繼續造好，一度升超過6%，但中段升幅收窄。
　　事實上，小鵬由舊年12月開始，喺50銀附近出現過唔少阻力，股價又升到嚴重超買，未來幾日再大升嘅機會唔高。有貨嘅朋友依家可以食咗胡先，無貨嘅朋友就可以等股價落番35銀，先再考慮買入喇！

《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情