博客有個朋友早早移民，佢同一眾年輕人一樣，都中意買美股，因為美股「只升不跌」嘅神話都吹足好多年。

　　當然啦，博客專注於港股，對於班買美股嘅師兄，個個日日都係到「GEL晒頭」咁，只能夠講，當雪山崩塌時，沒有一塊雪花是無辜的；但至於幾時會崩塌，通常都係剎那間。

　　點解美股可以造就到呢種「不滅神話」？背後原因，其實同「廉價日圓」有關，因為不論基金同資本，係呢十幾年來都係借日圓去入市，呢種幾乎「零成本」嘅借貸，導致美日韓台四地股市不停抽升，所謂「借完又借」，只要有盈利還到「低息」，過到海就係神仙。

　　呢種玩法其實已經持續左十幾年，只係苦左日本班市民，因為不論環境好定環境差，佢地都無辦法加息，就算加都係加一兩次；但上次日本從「負利率」走到「正利率」，市場已經敲響警鐘，呢種低息年代係咪已經過去？

　　博客唔識講，只係知道末日派對前的狂歡，無人會意識到危險即將來臨。博客又望下日股、又睇下美股，不停都係破頂破頂破頂，而且大家都係唔識停咁，我就知道，其實係時候差不多清倉離場。

　　其實你可以睇睇，巴郡手持現金率應該係目前最高水平；另一方面，誠哥又不停套現賣資產，賣百佳、賣電訊、賣燃氣公司，有啲嘢真係見微知著，有錢佬都要「現金為王」，你話你繼續入市？祝你好運啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2026去邊最好玩？etnet為你提供全港最齊盛事活動，所有資訊盡在掌握！► 即睇