今日大家心情都沉重，博客都唔講咁多笑，反而想講下保險個問題。

　　今日新聞賣到，宏福苑係經中國太平（香港）買大廈外牆同公共地方保險，最高理賠額係20億，有好多人都擔心話：「會唔會因為人為因素而（踢保）？」

　　博客唔係賣保險，純粹知小小保險業點運作。呢單保可以分開幾位去分析，第一就係法團原本QUOTE左十間保險，但只有太保出價，反映其他保險商有可能都知道「風險極高」，又或者本身保險公司同屋苑「交往經驗」唔好，一傳十十傳百，就情願唔做你生意算啦。

　　第二，會唔會唔賠呢？博客就唔清楚佢個保險條文點寫，唔敢一錘定音。但邏輯去思考，應該係要理賠左先（人地又國企，呢單案又係居屋，習主席又落命令，國家級柯打啊！），然後睇政府報告點寫，如果發現人為因素影響，有機會去Claim承判商或承判商份保險，要打官司啦，呢個都常見「代位賠償」。

　　第三，係咪一定太平自己食晒呢？又未必，太平按道理自己都應該買「再保險」，將個風險分散出去；關鍵就係，太平同再保險之間，就住呢場火，要為「認唔認數」呢個定論要再傾傾，即係太平同再保險有機會傾唔埋，又要嘈過，又打官司（可能咋）。

　　但無論點都，中國太平呢鋪真係飽晒，分分鐘係今年跑嘅單都要白做。無論點都好，都希望大家平安、安好，意外嘅東西，真係一單都嫌多。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【樂本健11月限時優惠！】 憑獨家優惠碼【ETN2511】，購物滿$500即送免費禮品► 了解詳情