花旗國議息終於塵埃落定，聯儲局大家姐冇出嚟放鷹嚇班缸友，加上油價連瀉七日後見翻身，淡友就暫時四散而去，魚缸即時變得生猛，今朝（１６日）高開成３０９點。雖然升勢之後顯得腳軟，但好快又升過，半日升有３００幾點進帳，成功守得住二萬四呢個大關。
　　神州電訊穌屐老二聯通（００７６２）噚日（１５日）收市後派成績表，雖然大部分數字唔多好睇，盈利更加係大幅縮水超過九成，但係由於去年首三季已經少賺咗八成，缸友已經預咗聯通舊年業績唔會好得去邊，加上年頭已發盈警，有關業績嘅利淡因素亦一早已經消化晒。而且今日魚缸鬼咁有精神，聯通派完成績表之後仲要被成班大行唱好，唔少大行畀嘅目標價都相當牛，都有１２銀以上，以現價計，潛在升幅都至少有兩成以上。
　　仲有，聯通話今年會大幅削減資本開支，加上低基數效應，業績反彈幅度應該都會幾好睇。依家神州嘅４Ｇ滲透率枕住都有理想增長，聯通既客戶數量雖然遠落後於老大祖國移動
（００９４１），但係都反映聯通未來有龐大嘅增長潛力，都值得睇高一線。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇