魚缸今個禮拜頭三日都好氣勢如虹，升咗５３６點，但今日魚缸終於見紅，突然跑得咁急點都要回一回氣，好彩嘅喺跌幅隨著時間收窄，魚缸半日都只係跣低咗唔夠１０點。
　　魚缸呢排係威係勢，加上祖國魚缸呆呆滯滯，上面嘅缸友都多咗落嚟香缸炒番轉，ＱＱ
（００７００）仲要連日破頂，認真巴閉。不過，有謹慎嘅缸友就話，雖然多咗祖國缸友落嚟餵魚，但係加加埋埋，每日成交都唔算高，仲未突破到８００億銀，反映咗有唔少缸友都寧願睇定Ｄ先再諗吓落唔落場，加上下個禮拜就踏入五窮月，魚缸都未必可以枕住有得升。
　　佢哋話呢個ｍｏｍｅｎｔ，最好揀返Ｄ優質魚仔嚟養吓就最好，梳化達人敏華
（０１９９９）就喺首選之一。花旗國係敏華嘅主場，幾日前公布嘅三月新屋銷售大嗱嗱有成
６２﹒１萬間，按月升咗近６巴仙，仲要喺舊年７月以來最高，比預期嘅５８﹒３間多。個邊嘅樓價升幅已經連續五個月都有所擴大，加上物價正慢慢升緊，花旗國經濟點都唔會差得去邊。
　　神州喺敏華嘅第二主場，除咗喺神州嘅舖頭愈開愈多之外，年年嘅銷售都枕住有雙位數升幅，呢排仲要話推出新牌子，前景都比唔少大行睇好。
　　業績固然喺敏華賣點，呢幾年派息都愈嚟愈闊佬，仲要送埋紅股，防守力自然唔話得。以噚日收市價計，今年以來升咗２３巴仙，今年預測市盈率都只喺１５﹒３倍，Ａ場上市嘅街坊閒閒地都有廿幾倍以上，估值吸引，缸友都可以諗諗買呢隻優質魚仔嚟養吓。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情