花旗國上星期公布加息同預告今年內開始縮表計劃，魚缸上星期跌成４０３點，跌穿廿天線。不過，魚缸經歷一星期波動之後終於有番朝氣，今日高開１０９點之後仲上番十天線水平（約２５８５６），多個板塊齊齊升，ＱＱ（００７００）上星期跌穿廿天線後，今日發力重上十天線水平，最高上到２７７﹒６銀。神州方面，國指同滬指喺內房同內險股帶動下都回升。望到個市唔再頭耷耷，相信咁多位缸友今日心情都特別好！
　　好消息就唔會嫌多，中金今日升恒安（０１０４４）評級，由「持有」升到「買入」，目標價維持６８﹒７７元。睇番圖表，恒安今年３月畀大行唱淡，兩日急挫逾一成到５８銀水平，之後雖然都偏軟跌到最低５２﹒８銀，但近日續見反彈，今日仲裂口高開，最高上到５８﹒１５銀，同中金嘅目標價雖然仲差成節，但恒安創辦人許連捷上星期總共增持６０萬股，恒安主席施文博上星期都增持１３萬股，相信恒安今鋪真喺有潛力升，翻身在望。之前恒安跌成咁，相信有唔少缸友都已經睇淡沽盤，不過呢個對仲有恒安揸手嘅缸友嚟講喺利好因素，缸友不妨等多排，未有恒安揸手嘅不妨買入，如果恒安喺大行唱好下成功修補裂口，上到目標價，股價分分鐘高過急挫前水平哩！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇