全球手機大佬蘋果上個月終於都出咗「唉瘋８」，「孖屐」由望穿秋水到失望而回，除咗因為個個都期待全屏幕嘅「唉瘋Ｘ」外，「唉瘋８」更係時不時傳出電池有膨脹問題，而且外殼同個「芒」相當「化學」，幾乎一跌即爆咁滯，真係令到一班果迷相當有「驚喜」…。
　　可能因為蘋果效應已經冇之前咁勁，跟蘋果搵食嘅設備佬喺上個月嘅股價表現統統插水，瑞聲（０２０１８）跌近８巴仙，高偉（０１４１５）跌近６巴仙；鴻騰精密（０６０８８）就跌得最甘，上個月蒸發咗近兩成半，若果以九月最低位４﹒５銀計，就蒸發咗近３２巴仙。
　　跟神州手機佬搵食嘅街坊就比較省鏡，比亞迪電子（００２８５）九月份升近７巴仙，鏡頭一哥舜宇（０２３８２）就彈高咗近１１巴仙。不過，舜宇今日公布咗九月份手機鏡頭出貨量數據，雖然按年增近６７巴仙，但按月計就升咗唔夠１巴仙，搞到舜宇上晝唔見咗４巴仙。
　　舜宇嘅大客華為將會喺下個禮拜一（１６日）喺德國公布新手機「Ｍａｔｅ１０」，喺「唉瘋８」咁令人失望之外，「唉瘋Ｘ」又傳話會供應緊張，自然個價都唔會低得去邊，所以華為有新機出，大有機會可以擴大佢喺神州「孖屐」嘅市佔率，而舜宇有唔少訂單都來自華為，加上華為新機同樣用到雙鏡頭，功能更加係勁「升呢」，舜宇亦有望可以水漲船高。走勢方面，舜宇一舉跌穿咗條１０天線（１２７﹒３２銀）同２０天線（１２７﹒２５銀），可以考慮吼至１２０蚊附近水平入貨，「他屐」睇１３０蚊以上。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇