魚缸噚日（１５日）終於停一停連升１４日嘅步伐，回吐返７３點，算係中途嘅技術性調整。果然，今日（１６日）好快就重拾升勢，朝早高開８４點，之後愈升愈有，繼續向歷史高位（３１９５８點）進發啦喂！
　　雖則丘鈦（０１４７８）先前就發咗個盈喜，話預計舊年全年多賺超過一倍，缸友聽到消息都好開心，股價噚日最多仲跳起過近８巴仙，不過收市就縮晒水，只係升逾１巴仙。今日上晝更加要逆市碌跌，皆因瑞信同大摩都同樣話盈喜無驚喜，分別調低目標價至１３﹒６銀同埋
１３﹒５銀，大摩更加直指盈喜令市場失望添！
　　仔細望下瑞信份報告，指出早前已經預期過丘鈦去年會多賺１﹒９７倍，加上因為風險因素增加，預期手機鏡頭企業嘅毛利會下跌，所以調低丘鈦２０１７年至２０１９年嘅每股盈利預期１４至１８巴仙，前景好似都唔係太有動力。
　　睇埋今日各位街坊嘅表現，雖然魚缸上晝再升，進一步向歷史高位邁步，不過手機設備佬就繼續落後於大市，近排衝高動力可能都唔太夠。持有丘鈦嘅缸友，建議先於十天線附近止蝕為佳。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情