上個月神州嘅人仔新增貸款勝預期，加上銀保監適度放開兩全保險產品，神州金融佬班「大師兄」終於返哂嚟，刺激埋大隻佬指數連升兩日添！當中有一隻魚毛不得不提，就係國壽（０２６２８）啦！
　　話說最近內險業嘅消息不絕。銀保監最近向人身險公司下發《規範兩全保險產品有關問題的通知》，允許銷售三至五年期兩全險。有孖屐人士話，由於短中期之兩全險嘅理財性質較高，呢個計劃話唔定短期有利保費加快增長。另外，銀保監早幾日亦公布正式取消經營人身保險業務嘅合資保險公司嘅外資比例限制，合資保險佬嘅外資比例可達１００巴仙，行業競爭或加大。
　　今年神州保險佬業績一Ｄ都唔失禮，今年前三季度，保險佬淨利潤實現近２８００億人仔，按年增長成約１２３巴仙！而三季度嘅人身險公司淨利潤實現２３００億銀人仔，按年賺多近１１５巴仙。當中８６間非專業養老險公司入面，６４家公司嘅淨利潤實現正增長，其中１１家公司扭虧為盈添！
　　國壽自己今年頭１０個月累計原保險保費收入，有成５２０４億銀人仔按年升近６巴仙；首三季新業務價值按年增長２０巴仙，以保險佬大哥大嚟講算係唔錯。
　　業績唔錯當然吸引大行吹捧。交銀認為，目前神州保險市場存在對中短期理財型保險產品嘅需求，神州保險深度同密度與成熟保險市場比仲有較大差距，而居民對理財屬性較強嘅保險產品需求旺盛。另外，交銀話目前行業估值仲係偏低，風險收益比有吸引力。大摩早前亦都發表研究報告，話估計神州保險業將迎嚟更多產品同分銷渠道改革，行業增長可支撐股價回報達１０巴仙以上水平。大摩維持對行業「吸引」嘅看法，仲將國壽目標價由２２銀升至２３銀，維持對「與大市同步」評級。
　　睇返公仔圖，國壽噚日（１１日）造出一枝大陽燭，然後今日（１２日）再裂口高開，呢個星期仲要企穩十天線（２０﹒０７１銀）上面，反映有資金追捧。另外，佢嘅ＭＡＣＤ剛剛出現黃金交叉而又見牛叉，呢Ｄ都係入貨訊號。再者，相比平保（０２３１８）佢走勢只算係橫行，相信有機會追落後，只要佢升破２１﹒５銀呢個阻力位，短期上返２２銀無難度！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情