恒指公司宣布，將於８月１４日（星期五）宣布第二季度恒指系列檢討結果，孖屐就估計到時阿里巴巴（０９９８８）、美團（０３６９０）同小米（０１８１０）呢類新經濟股，有望「染藍」。博客覺得呢個消息仲有得炒，阿里仲有唔少水位可以上！
　　不過，同其他股份在指數上限權重為１０巴仙唔同，Ｗ股和第二上市公司嘅指數權重，每家公司上限只有５巴仙。高佬之前就估計，依家分別有１７０億美金及９０億美金嘅被動基金追蹤恒指及國指，若阿里獲納入兩個指數，將會有１３億美金被動資金流入，影響力絕對唔細。
　　高佬報告話，維持對阿里巴巴「買入」評級及「確信買入」名單，主因「６１８」交易額達６９８２億人仔，顯示出集團第二季度參與度、商品交易總額和收入增長率均有回升，預料其可如期復甦。高佬仲話睇好阿里，原因仲包括軟銀水減持之憂慮消除，認為目前估值處便宜水平；今年以來股價表現跑輸中概股１６巴仙嘅升幅，料阿里有望喺８月「染藍」等等，因此將其港股目標價由２７３銀上調至２７６銀。
　　再加上旗下阿里雲未來三年投入２０００億人仔，用於核心技術研發和數據中心建設；並在東南亞加強拓展，今年擬再度擴建印尼數據中心；在菲律賓成立生態聯盟，加速進軍當地市場。疫情後企業加速數碼化，阿里自然可望受惠，股價有力向上突破。
　　技術走勢上，阿里半日再試企２２０銀，短線嘅話可以望返１月嘅高位約２２７銀。不過，博客覺得佢都連升三日，應該會回一回氣先再衝上，缸友可以等回調到１０天線同２０天線附近，即係２１５銀邊再吸納，目標先睇２４０銀。如果短線失守２００銀就好放棄啦！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情