拜登放風打算鬆綁關稅，但係就唔係好幫到魚缸沖喜，今日早段表現好立，曾經跌超過280點，又番到兩萬點邊喇。雖然日線圖裏面，10天線依家準備向上升穿20天線，但由今年2月高位25050殺落去到依家，仲未升得穿50天線，繼續一頂低過一頂，反彈空間未必好大。
　　博客同大家睇下小鵬(09868)，噚日(23日)公布咗第一季業績，以非公認會計原則計算，淨虧損擴大到15.28億人仔，比舊年同期嘅6.96億人仔多咗超過一倍。另外，第一季小鵬汽車交付量3.46萬架，按年升1.59倍；收入74.55億人仔亦按年升1.53倍，按季就跌12.87%；毛利率12.2%，按年升1個百分點，按季升0.2個百分點。如果對比佢嘅對手理想(02015)嘅話，只有交付量表現好啲，其他指標都跑輸，整體毛利率同埋增長更加差理想(第一季:22.6%，按年升5.3個百分點，按季升0.2個百分點)接近一半，表現唔算太好。
　　小鵬預期第二季度總收入介乎68億至75億人仔，按年增長約80.8%至99.4%；汽車交付量就介乎3.1萬至3.4萬架，按年增長約78.2%至95.4%。大行瑞信就提到，小鵬4月賣出約9萬架車，預計5月同6月會分別賣出1.1萬同1.4萬架車。大摩都講到，小鵬指引5月同6月每月平均銷量為1.1到1.25萬架車，6月銷量仍有上行空間，並估計P7佔比增加，以及新訂單漲價可以令平均售價再上升。喺小鵬公布業績之後，兩間大行都無調低美股嘅評級(瑞信:維持優於大市；大摩:維持增持)，對公司前景未睇得太淡。
　　博客覺得，依家小鵬面對嘅首要問題係內地復工復產嘅進度，雖然上海宣布分階段解封，但其他城市嘅疫情仲未回穩，呢個仍然會係一個變數。仲有，零部件供應、毛利率等問題都困擾住小鵬，股價目前仲係下降軌，喺條50天線掙住咗，主要平均線仲未有轉升跡象，短線落番78銀分階段吸納較為合適，目標睇98銀。博客再次提醒大家，造車新勢力每日嘅波動好大，本身喺美股又有上市，部署上唔適宜太長線，如果穿埋年內低位71.85銀就要止蝕喇！

《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情