曾幾何時，「大富豪」堪稱風雲地、英雄地，香港幾多單大Deal都係呢個地方傾返嚟，男人傾生意從來都係酒杯底傾出來，所以博客同幾個Banker吹水，都話有舊客仔想拉埋個Banker一齊出去「懷緬」一下當年風光。

　　不過呢一轉新開嘅「大富豪」，已經講明做娛樂場、無PR、甚至小朋友都入得去玩嘅「歡樂天地」，真實情況係點呢？開業首日已經有一大班警察同便衣入去「照田雞」，因為收到線報有一個洗黑錢逃犯係入面，所以要開燈拉人；昨晚（15日）又有一條片流出，明明話無PR，但入面著得性感嘅小姐全部係到行來行去咁。喂，又話可以俾小朋友進場嘅？

　　但值得關注一點係，大家都講緊「大富豪」主要CEO係李健民，但背後有一位持中國護照嘅「神秘股東」，據聞持有大富豪一半股權，有媒體搵到呢位富豪就係北京商人楊超，而李健民本身都承認左。

　　博客係網上搵到同樣都係叫「楊超　(商人)」資料：2005年5月擔任中國人壽保險（集團）公司總裁、黨委書記。2011年退休後仍以行業專家身份參與考察活動，2025年3月因涉嫌嚴重違紀違法，接受中央紀委國家監委駐中國人壽紀檢監察組紀律審查和江西省上饒市監委監察調查。

　　唯一唔同嘅係，呢位「楊超」並唔係北京人，而係上海人。

　　對於有內地資金可以落香港開「大富豪」，其實部分Banker認為中資開咁大個場，其實係想招呼班內地大客，等佢地落香港「有地好去」，唔使成日去咩「北京天上人間」、「上海百樂門舞廳」咁悶；同樣都係意味內地資金入香港可能會鬆手少少，開呢間大富豪都係踏腳石，未來可能有更多國家級任務要做，或者要重開埋「中國城」！咁就真係香港財經界一大「盛事」，中環人吊咁耐鹽水，睇怕有盼頭啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】巴拿馬最高法院裁定長和港口合同違憲，港口營運暫時由丹麥馬士基接管。你認為中方以及長和會否採取措施強力反制，以維護利益？ ► 立即投票