花旗國魚缸噚晚（２２日）成功連升９日，繼續破頂十分強勢，但係今朝
（２３日）香江魚缸腳軟軟，新世界發展（０００１７）獲多間唱好亦獨力難支。
　　新世界噚日中午公布半年多賺３１巴仙至逾４３億銀，鄭家第３代鄭志剛上位。新世界獲瑞信升目標價，由１０﹒８銀升到１２﹒２銀，維持「跑贏大市」評級，解釋話收購同轉長沙灣地塊用途可以紓緩缸友對新世界盈利持續性嘅憂慮。另外高盛同美銀美林都升佢目標價，美銀美林指本港出「加辣」後樓市見支持，佢會係主要受惠者。
　　除咗業績靚同埋管理層畀到大家信心外，噚日公布嘅財政預算案對樓市算正面，減差餉同埋退稅等措施都係對樓市有幫助，見其他地主股今日都逆市走高就知。
　　睇番公仔圖，新世界升破１０蚊轉格位，暫時連升第四日，曾創逾年半高位，雖然好強勢，但小心升破保歷加通道之後見回吐，加上聯儲暗示可能就快又會加息，趁高位減持多少都唔錯，但唔好放晒住，等睇下升到幾時到頂！
　　
　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇