魚缸經歷３連跌，今朝（２３日）終於有返啲起色，但最多亦只係升過９５點，力水依然唔多夠。魚缸６月份幾次升破二萬六大關之後都企唔穩，外圍又冇咩特別利好消息，惟有繼續炒股不炒市。
　　噚日收市前，海航、復星系股份閃崩，有指神州再次捲起監管風暴，阿爺要求排查「海外併購明星民企」嘅授信同債務融資風險，萬達、安邦等等都被點名。歸根究底，紅色企業近年瘋狂出洋掃貨，資產借貸數以千億計，令阿爺擔心萬一出事會影響金融體系穩定。
　　相信阿爺出到聲，依批「明星民企」都會收歛啲，向錢莊融資嘅難度亦會增加，但正如復星所講，集團一切正常，實際上對營運唔會有咩影響。而復星醫藥（０２１９６）更加甚少參與海外併購，今次真係「躺著也中槍」。
　　復星醫藥噚日受氣氛影響，但喺百天線見重大支持，今日反彈後，可以考慮喺３０蚊邊買入，長遠有力再挑戰３４﹒４１７銀歷史高位。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情