話說自從幾年前谷歌離開中國之後，近排官媒《人民日報》就突然放風，話歡迎谷歌回歸，但要遵守中國法律。
　　盈盈我睇完之後，覺得做乜好似譚炳文對李香琴唱「你回來吧」咁款，正所謂「你淚落我滔滔哈哈笑，哈哈哈哈！」谷歌嘅龍頭桑德爾最近開內部會議，同班細嘅講：「雖然呢，我地係好想打入中國呢個江山，但我哋應該未有耐會重返嘅。」
　　咪住！有谷歌二五仔向傳媒爆料，話谷歌為咗返中國，就同阿爺做咗單檯底交易，就係谷歌利用自己喺北京嘅網站，建立一個敏感詞數據庫，再將呢類數據ｓｅｎｄ返過百度，符合返北京嘅審查制度，而呢個項目名為「蜻蜓計劃」。呢單野曲折離奇，無間道劇情咁款，而家各範人馬都搵緊料，究竟谷歌返唔返中國呢？有待下回分解！
　　之但係，中國同谷歌嘅恩恩怨怨點會咁簡單呢？話分兩頭，最近中國出咗款「紅芯瀏覽器」，話要挑戰谷歌Ｃｈｒｏｍｅ地位咁犀利，簡直係「厲害了我的國」系列之一。
　　但紙點包得住火？有眼利網民發現，原來紅芯嘅核心代碼全部都係來自Ｃｈｒｏｍｅ，即係你買咗件衫返黎，再黏自己Ｌｏｇｏ上去話自己手製，唔笑大人個口咩？之後紅芯都行出嚟道歉，話自己跨張咗小小，唔應該提及「國產自主」四粒字。媽！睇見都覺得好醜啊，道歉幾多次都無用啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇