早喺三年前依個沙特阿拉伯國營石油巨霸沙特阿美就已經對上市蠢蠢欲動，但係講咗咁多年都係無咩動作。隨著近年全球石油需求可能會破頂，沙特阿美終於扚起心肝，喺今年１１月正式宣布啟動上市，外界都係到推測沙特阿美有可能成為全球最大嘅ＩＰＯ，破阿里巴巴嘅集資紀錄。就喺前幾日沙特阿美發布招股書，佢係唔係真係有機會勇奪全球冧巴ＯＮＥ？
　　沙特阿美首次招股只係公開發售私有化２０００億股份入面嘅１﹒５巴仙，每股造價喺３０里亞爾（８美金）至３２里亞爾（８﹒５３美元）。意味著依間全世界最賺錢公司初步估計嘅市值只係６萬億里亞爾（１﹒６萬億美金）至６﹒４萬億里亞爾（１﹒７萬億美金）之間，遠低過早前市場預計嘅２億美金。雖然係咁，沙特阿美仍然超過現時排名冧巴ＯＮＥ嘅全球市值最高公司蘋果（現市值１﹒１８萬億美金），躍升成為冧巴ＯＮＥ。
　　只不過，今次沙特阿美只喺沙特阿拉伯上市，唔會直接或間接喺花旗國、袋鼠國、楓葉國或東瀛發行股份，市值同認購價會喺１２月５號公布。之但係有報導指出，今次沙特阿美發售股份唔算多，估計只係大約集資到２４０億美金至２５５億美金，而阿里巴巴２０１４年首次喺花旗國上市係創造咗２５０億美金嘅紀錄，所以沙特阿美有可能破唔到阿里嘅紀錄。
　　阿美有豐富石油儲備同大量嘅日產量，佢喺世界最大嘅原油出口國擁有壟斷地位。喺今年佢首三季利潤６８０億美金，並承諾到２０２４年可以每年派發７５０億美金嘅股息。沙特阿拉伯首次出售阿美股份，希望可以擺脫其對石油依賴，令經濟多樣化計劃嘅一部分。至於，沙特阿美集資量最終可唔可以破阿里嘅紀錄，大家就要喺１２月５號見分曉了。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情