呢幾日神州有單新聞成為唔少人茶餘飯後嘅話題，就係ＱＱ疑似畀人昆呀！哇，貴為市值近５萬億元嘅香江股王、神州手遊一哥都畀人昆？睇真啲，原來呢件事仲牽涉另一個超級大ｂｒａｎｄ，就係調味料品牌老干媽，花生指數直線飆升！
　　香江人對老干媽應該唔係太熟，事關超市係無得買嘅。不過，佢對神州人嚟講可以話係「神聖」嘅存在，呢樽辣椒醬由辣椒、發酵過嘅豆同油製成，據聞不單止味道上乘，仲有多層次質感，唔少港漂就係靠佢解鄉愁。近年亦成功俘虜唔少外國人，代購２１０ｇ已經索價近８０銀港紙。如果仲未知佢有幾勁，盈盈再講多個例子，喺２００７年，深交所副總經理王紅親自拜訪，表明歡迎佢去深交所上市、發債，話會提供專業支持呀。
　　而今次就係ＱＱ要控告老干媽無按照上年簽嘅合同畀廣告費，凍結佢名下約１６２４萬人仔財產。不過老干媽盲發聲名話從未同ＱＱ合作過，警察仲好快拉咗三個疑犯，話佢哋假冒老干媽名義簽合作協議，目的居然只係為咗ＱＱ送嘅遊戲禮包碼。唔通遊戲禮包碼好值錢？事關要令ＱＱ相信，犯罪成本應該好高。
　　原來，禮包碼真係可以好值錢。神州有案例，有個「德州撲克」玩家，以單個游戲幣低過官方嘅價格由玩家手中回收再賣出，從中賺取差價，喺短短兩年間獲利高達１５００萬人仔。神州網民推斷，今次涉及嘅係「ＱＱ飛車」手遊，二手飛車禮包價格大多在１０至５０銀人仔左右，一般都係衫、頭髮等角色裝扮，如果係賽車皮膚嘅禮包，大部份１００銀人仔樓上。
　　ＱＱ未透露喺呢件事上嘅實際損失，但唔知係咪覺得無面，淨係喺微博回應「一言難盡」，而為咗防止類似事件再發生，會送出１０００瓶老乾媽嚟徵求類似線索喎。有律師話，呢次ＱＱ受騙好大機會係合同審核流程同法務管理制度，都存在著重大嘅紕漏。
　　唉，只可以講心急做生意嘅商家佬仲有好多，但處心積累嘅騙子更多，希望ＱＱ盡檢討下問題出喺邊度，下次把關嚴謹啲，如果唔係等到上晒報先知自己畀人呃咗，會好打擊合作夥伴同公眾對公司嘅信心。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇