南韓文化輸出多年，令南韓產品喺海外愈嚟愈受歡迎，當地商品出口順帶升到嘭嘭聲。好似韓式辣椒醬就係其中之一。
　　南韓農水產食品流通公社同埋南韓農業部周日(23日)公布嘅數據顯示，苦椒醬(俗稱韓式辣椒醬)2020年出口額達5093萬美元，比2016年勁升62.6%，而且比2019年大升35.2%。
　　南韓農水產食品流通公社表示，愈來愈多外國人觀賞韓國流行音樂(K-Pop)明星如防彈少年團(BTS)嘅表演，喺網絡串流媒體服務(OTT)又越嚟越多接觸南韓文化，其後開始對韓國菜感興趣，似乎推升韓式辣椒醬近幾年嘅出口。
　　其實喺2020年受疫情影響，整體出口值減少5.4%嘅情況下，南韓嘅出版物、電玩、音樂、電影同埋電視劇等娛樂出口值逆勢增長6.3%。
　《彭博社》舊年亦報道過，南韓長期以來以佢嘅製造業實力著稱，但係《魷魚遊戲》正將南韓嘅文化影響力提升到新層次，並因此預示一股新嘅經濟驅動力。
　　呢個結果都可能係南韓推廣海外文化多年嘅成果。盈盈曾經睇過外國嘅電視台播放節目推廣跆拳道同埋介紹韓國菜，韓國人亦樂意同外國人講英文，令外國人對韓國文化感興趣亦唔出奇，而透過睇劇集和音樂表演嚟接觸，可能只係多一條渠道而已，話係推手就未必一定。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇