《笑傲缸湖》「侵侵」有ＧＵＴＳ有性格就人所共知，但係最令男人羡慕嘅，莫過於佢仲係大老細嘅時候，身邊總是美女如雲，老婆一個比一個靚，佢個令千金更加係令不少男士神魂顛倒，盈盈相信佢唔入白宮，走去選環球小姐都必定會大殺四方。不過，「侵侵」雖然係唔少男人嘅成功典範，但就經常口出狂言，講左唔少得罪女性嘅言論，做左花旗國總統之後，更要求喺白宮返工嘅女性唔好著到咁「ＭＡＮ」，要打扮得似返個女人。係三八婦女節個一日，更有唔少美國女生上街示威，話「侵侵」歧視佢地。　　但係鐵漢總有佢柔情嘅一面，米字國首相文翠珊接受《時尚》雜誌（Ｖｏｇｕｅ）訪問時話，佢出訪花旗國果陣時，佢同「侵侵」喺白宮準備行落一條斜路，「侵侵」就好溫柔咁拖實佢，更大讚「侵侵」係一個好有紳士風度嘅男人。對比上星期「侵侵」黑口黑面咁對住德國總理默克爾，又一度唔同佢握手，真係好大對比。　　雖然「侵侵」前幾日先話，米字國早前幫奧巴馬政府對佢進行監聽，不過畢竟「侵侵」同文翠珊喺移民政策上都同聲同氣，大家都一致認同要收緊各自嘅相關政策，而文翠珊仲話「侵侵」好有風度，話唔埋「侵侵」聽到之後，暫時唔再追究監聽呢件事呢。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇