《笑傲缸湖》唔少人應該仲記得「Ｐｏｋｅｍｏｎ　ＧＯ」登陸香江時，大人細路，甚至係老人家都為之瘋狂，無論係是早午晚，滿街都是「精靈訓練員」，唔少機迷都嚮往會唔會有更多ＶＲ（虛擬實境）同ＡＲ（擴增實境）概念嘅手機Ｇａｍｅ推出。呢隻Ｇａｍｅ舊年七月頭係花旗國同袋鼠國推出，同樣吸引唔少粉絲下載，單係頭半個月，任天堂股價就坐火箭咁升咗超過一倍，所以話比卡超係全球最受歡迎嘅卡通偶像應該係當之無槐。　　眼見依家手機遊戲大行其道，任天堂當然想食住上，家陣仲利用孖寶兄弟馬里奧呢個人氣招牌去大搞手遊。其實任天堂已經係舊年１２月係ＩＯＳ平台推出《超級馬里奧Ｒｕｎ》（Ｓｕｐｅｒ　Ｍａｒｉｏ　Ｒｕｎ）。係推出嘅短短個半月入面，就有成７８００萬嘅下載量，去到今年嘅一月底，為任天堂帶嚟約５３００萬美金嘅收入。不過，「Ｐｏｋｅｍｏｎ　ＧＯ」係推出兩個月內嘅收入就已經超過５億美金，簡直係小巫見大巫。　　雖然馬里奧係噚日（２３號）正式登陸Ａｎｄｒｏｉｄ，而Ａｎｄｒｏｉｄ手機佔全球手機系統有成八成以上，但盈盈上去地區Ｐｌａｙ　Ｓｔｏｒｅ望望，下載次數唔夠２５萬，反應都唔算好踴躍。手遊一向都短命，馬里奧玩法較為千篇一律，亦吸引人去長玩都有ｄ難度，加上唔少玩家都唔多願意去課金，而「Ｐｏｋｅｍｏｎ　ＧＯ」課金嘅人數係咁跌，睇嚟任天堂長遠都係要不斷開發唔同嘅遊戲先至正路。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】的士業「放蛇」舉報Uber，政府應否將網約車合法化？你是否支持該類自行「放蛇」行為？► 立即投票