《笑傲缸湖》一向喺能源方面提倡環保嘅蘋果公司又有新搞作，公司打算回收番Ｄ舊機，循環再用Ｄ物料，承諾會結束「採礦活動」。　　蘋果目前雖然有拆機機械人Ｌｉａｍ幫手，每年最多可以拆解２４０萬部機，但「唉瘋」大部分零件唔會回收，公司就希望可以更加積極盡量咁拎番Ｄ物料出嚟再整過新機，例如會鼓勵「果迷」乖乖地配合拎番Ｄ機出嚟，而最終目標就係唔使再開礦開採稀土。　　但計劃還計劃，究竟幾時先可以做到成部機１００％由循環物料去整先？蘋果公司份發展報告入面無直接答到呢條問題，解釋話仲有Ｄ物料仲未可以靠現今科技循環使用，要再研究吓先得咁話。希望蘋果公司每年可以公布個進度啦。　　環保係大趨勢，新「唉瘋」用舊物料整盈盈都唔會反感，最重要係保持到部機嘅質量，同埋個設計要夠靚靚仔仔。另外，用得循環物料去整，售價唔該平番Ｄ！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情