《笑傲缸湖》上星期五（１１日）魚缸因為外圍政局不穩而大跌，全世界都怕咗肥仔金同侵侵會傾唔掂數最終開火。正當盈盈同班姊妹都為自己Ｄ投資水瓜打狗唔見一截而煩惱時，原來太平洋另一邊，有Ｄ商家卻因為可能開戰而沾沾自喜。　　花旗國人太平盛世時就已經鍾意為喪屍危機呀、世界末日呀呢Ｄ危難日子做好準備，所以衍生出一班為末日準備者服務嘅商家。近日花旗國有探子回報，原來末日準備用品店，賣嘅有罐頭、肉乾、濾水器等等，近日生意因為侵侵同肥仔金嘅關係惡劣而變得愈來愈好。以前侵侵剛上台時，世人都關注緊侵侵嘅對外態度，揣摸地球步向末日嘅機率，認為和平嘅機會較大，所以嗰排班商家嘅生意都淡咗。依家美朝兩國講到就開戰咁款，又再燃返起末日準備者嘅擔憂。　　不過，盈盈可以同各位「末日準備者」講，大家係有時間準備嘅，皆因路加福音有一句：「你們聽見打仗和動亂的事，不要驚惶；因為這些事必須先發生，只是末期不會立刻就到。」即係話，世界末日唔會即刻就到，唔使擔心！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情