《笑傲缸湖》喺現代文化社會入面，足球隊係一個國家或者地區嘅象徵之餘，更加係一間廣播公司嘅命根！點解？因為隊波嘅勝敗，隨時影響一間廣播公司嘅收入！　　據報，花旗國廣播公司２１世紀霍士（２１ｓｔ　Ｃｅｎｔｕｒｙ　Ｆｏｘ）將會面對廣告收入下跌嘅困境。呢間公司旗下嘅Ｆｏｘ　Ｓｐｏｒｔｓ之前花咗２億美金，購買２０１８年喺俄羅斯舉行嘅世界盃花旗國英語轉播權。佢哋仲打算喺多個電視網絡同數碼平台上播出超過３５０個鐘嘅世界盃賽事項目。可惜花旗國男足竟然喺晉級賽度輸波，無緣世界盃，廣告客戶認為，因為自己國家都無份踢，咁樣將會令到唔少花旗國人對世界盃失去興趣，２１世紀霍士客戶落廣告嘅興趣都會削弱。　　Ｆｏｘ　Ｓｐｏｒｔｓ就話，將會喺營銷方面多下功夫，保持住觀眾對世界盃嘅興趣。自己國家隊無得踢決賽周就無興趣睇，從另一個角度講，可以話花旗國人真係十分支持同熱愛自己嘅國家，球迷噓國歌嘅情形應該唔會喺花旗國度見到卦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇