《笑傲缸湖》近排因洩漏用戶資料而搞到滿城風雨嘅臉書（Ｆａｃｅｂｏｏｋ），佢嘅創辦人朱仔（朱克伯格）幾乎每日都霸晒外國媒體嘅版面，受醜聞影響，ｆｂ股價都一度急挫，不過，根據彭博有錢佬排行榜顯示，朱仔嘅身家有成６８５億美金，喺全球排第五！　　而最近有探子回報，喺ｆｂ下個月開股東周年大會前有文件披露，朱仔人工只得一蚊美金，但舊年用喺朱仔身上嘅支出就有成８８０萬美金，當中主要用喺佢嘅個人保安同個人出遊方面，比２０１６年多咗逾五成！　　相比之下，蘋果同亞馬遜喺呢一方面就「遜色」得多啦，蘋果舊年用喺ＣＥＯ庫克（Ｔｉｍ　Ｃｏｏｋ）身上嘅保安同私人飛機嘅支出只係３１﹒７３萬美金；亞馬遜２０１６年用喺老細貝佐斯相關支出只有１６０萬美金，人工就得８﹒１８萬美金。　　早排先有新聞話，花旗國有位攝影師，幾年前咁啱影到朱仔放狗時幫狗執屎，唔駛幾耐就畀「實Ｑ」「邀請」去臉書總部傾計，跟住仲有幾個高層畀個「溫馨提示」佢，要佢刪晒偷影朱仔Ｄ相，所以個幾百萬美金保安支出真係唔係「流」。朱仔對保護用戶私癮都冇咁肉緊。　　盈盈仲知道有唔少公司創辦人嘅人工仲低過盈盈，誠哥每年只係象徵式收五千蚊人工，但佢係香江首富。股神巴菲特咁多年入面，年薪只有１０萬美金，但身家有成８５０億美金。如果盈盈有咁嘅身家，成世「白做」唔收人工，又有乜所謂喎。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動