《笑傲缸湖》中國人點睇都係飲啖茶、食個包，就算新一代都係飲咩喜茶、食個芝心包，再打個卡之類。神州改革開放之後，星巴克開打入內地孖屐之後，本來個個都拎個蘋果電腦、買杯拿鐵Ｇｒａｎｄｅ，再打個卡就係中產表現；但之從喜茶之類嘅手搖飲品推出之後，佢地「參考」埋星巴克嘅中產主義，成為新一代中產打卡精選。睇返星巴克中國區業績，原來係９年來首次業績出現下滑，營運利潤率由２６﹒６巴仙下跌至１９巴仙。　　有對沖基金「大鱷」之稱、潘興資本ＣＥＯ阿克曼（Ｂｉｌｌ　Ａｃｋｍａｎ）就話無有怕！佢重話要斥９億美金瞓身買入星巴克股份，刺激股價立即升５個巴仙。　　阿克曼話，星巴克股價未來三年可能會翻倍，但盈盈心諗，依家花旗國個孖屐「牛尾」啦下話？咁點樣翻倍呢又？不過佢咁講我就咁聽啦。阿克曼認為星巴克嘅商業模式值得欣賞，認為未來星巴克未來增長動力來自神州，因為同胞開始步入中產階級，剛剛ＦＩＴ到星巴克嘅品牌，相信神州業務嘅收入增長會係星巴克現時整體收益嘅兩倍。　　阿克曼呢頭就睇好啦，但靜靜話你聽啦，其實星巴克今年６月先講過，下一個財年就會關閉花旗國１５０間分店；上個月先話開始結構性轉型，包括從高層裁員，簡化決定程序咁話，究竟星巴克前景係咪真係咁好，盈盈真係睇唔透。　　其實，星巴克從一間賣咖啡豆嘅公司，變成依家全球性連鎖咖啡店，確實得來不易，但係中國人飲茶文化咁根深蒂固，咖啡文化會唔會係神州呢片土地企得穩，就拭目以待啦。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情