《笑傲缸湖》因為侵侵（特朗普）又再出嚟「發噏瘋」嘅關係，花旗國魚缸上個禮拜就咁蒸發咗超過４巴仙。雖然呢吓插水搞到缸友措手不及，但拉勻嚟計，嗰邊魚缸今年到依家都仲錄得升幅，道指升近３巴仙，標指同納指仲架勢，分別彈起近４巴仙同９巴仙，表現幾乎跑贏晒其他地方嘅魚缸。　　納指今年表現咁省鏡，花旗國搞科技嘅有錢佬即時身家暴漲，多一兩個零亦不足為奇，花旗國媒體喺度計數，以亞馬遜揸Ｆｉｔ人貝索斯（Ｊｅｆｆ　Ｂｅｚｏｓ）一年身家變化，除返開每個鐘大嗱嗱增加４４７﹒５萬美金，即係話人地做一個鐘就可以喺香江半山買到層豪宅，而盈盈打成世牛工都未必有咁嘅人工，真叫人情何以堪！　　花旗國媒體計過，貝索斯一個鐘頭所賺嘅錢，等於亞馬遜員工年薪中位數嘅１５７倍﹒﹒﹒全球大部分財富集中喺１巴仙嘅有錢佬身上呢句說話所言非虛。另外，貝索斯嘅「時薪」亦都係其他科技有錢佬望塵莫及，ｆｂ創辦人朱仔（朱克伯格）嘅「時薪」就有１７１﹒２萬美金，雖然差貝佐斯成倍，連車尾燈都見唔到，但朱仔時薪都足夠買到個太古城單位連車位﹒﹒﹒　　紐約時報可能眼紅貝索斯太有錢，前排發表咗一篇文章批評佢有太錢喺一件好唔正常嘅事，話佢應?去推動政策改革，令到科技驅動型經濟嘅利益分配變得更加公平，而唔應該一個人「獨 食」咁多財富咁話。　　割據一方嘅阿里巴巴馬雲之前爆出金句，一個月賺一二十億喺一件好難受嘅事；而貝索斯亦都喺公開場合呻，唔知點處理自己Ｄ錢。既然佢地有咁多煩惱，盈盈真係極之樂意為佢地分擔痛苦架。《任盈盈》　　

　　花旗國億萬富豪每小時身家增長表：　　－－－－－－－－－－－－－－－－－－－－－－－－　　１﹒貝佐斯　　　　　　４４７﹒４９萬美金　　　　　　　（亞馬遜）

　　２﹒朱克伯格　　　　　１７１﹒２３萬美金　　（Ｆａｃｅｂｏｏｋ）

　　３﹒愛麗絲﹒沃爾頓　　１３９﹒２７萬美金　　（沃爾瑪）

　　４﹒華倫﹒巴菲特　　　　９５﹒８９萬美金　　（巴郡）　　

　　５﹒拉里﹒佩奇　　　　　９２﹒４７萬美金　　　（Ａｌｐｈａｂｅｔ）

　　６﹒馬斯克　　　　　　　６８﹒４９萬美金　　（Ｔｅｓｌａ）　　

　　７﹒比爾﹒蓋茨　　　　　４５﹒６６億美金　　（微軟）

　　８﹒傑克﹒多爾西　　　　２０﹒５５萬美金　　（Ｔｗｉｔｔｅｒ）

　　９﹒梅格﹒惠特曼　　（ｅＢａｙ，ＨＰ）　　　１０﹒２７萬美金　　－－－－－－－－－－－－－－－－－－－－－－－－

　　花旗國名人「時薪」表：　　－－－－－－－－－－－－－－－－－－－－－－－－　　１﹒佐治﹒古尼　　　　　　２﹒７３萬美金　　　　　　　　　２﹒凱莉﹒詹娜　　　　　　１﹒９０萬美金　　　　３﹒狄雲﹒莊遜　　　　　　１﹒４２萬美金　　　　４﹒艾倫﹒狄珍妮　　　　　　９９８８美金　　　　５﹒勒邦占士　　　　　　　　９７６０美金　　　　　６﹒泰勒﹒斯威夫特　　　　　９１３２美金　　　　７﹒Ｂｅｙｏｎｃｅ　　　　　６８４９美金　　－－－－－－－－－－－－－－－－－－－－－－－－

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇