《笑傲缸湖》唔知大家有冇留意身邊男多定女多，香江其實一向算比較男女平等，連大學裏面都係女多過男；但其實好多企業管理層都係男多女少，而當中ＡＩ（人工智能）業界男女比例就更加懸殊。最近《世界經濟論壇》嘅報告就話ＡＩ業界唔夠兩成半職位由女性擔任，嗰性別ｇａｐ係其他行業嘅三倍，科技行業男多女少盈盈唔驚訝，但ＡＩ行業男女比例有咩特別值得關注？　　講起Ｓｉｒｉ，唔知大家諗起男聲定女聲？盈盈就即刻諗起嗰把溫柔又不失成熟，穩重又不失幽默嘅女聲，其實Ｓｉｒｉ喺大部分國家都係預設咗女聲，亞馬遜、谷歌嘅虛擬語音助理同樣預設女聲，用嚟接收同執行命令。谷歌嘅智慧寫信功能會假設「Ｉｎｖｅｓｔｏｒ」係「Ｈｅ」、「Ｎｕｒｓｅ」係「Ｓｈｅ」，比人閙爆之後，就索性取消咗性別代名詞建議功能。　　ＡＩ對性別嘅認知喺邊度嚟？邊個教佢ｆｆ護士就係靚靚「白衣天使」？投資者就係霸氣金融才俊？雖然ＡＩ其中一個特點就係能夠自主學習，但報告就話編程者嘅偏見會影響ＡＩ嘅思想，行業男多女少有可能令ＡＩ更容易受男性傳統思想同偏見影響，所以ＡＩ創造者必須能夠反映整體人口特點。　　ＡＩ係世界未來一大發展趨勢　　智慧城市、智慧家居，甚至有可能取代現有嘅大部分職業，係好係壞仲係未知之數，但盈盈可以好肯定ＡＩ喺未來世界地位將會舉足輕重，希望佢地唔係一班帶有性別定型同歧視嘅ＡＩ。不過，如果ＡＩ行業持續男多女少，未來嘅ＡＩ豈不是個個都好大男人主義？盈盈而家都係坐言起行，去學吓ＡＩ嘅相關知識先啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動