《笑傲缸湖》踏入２０１９年無幾耐，全球首富亞馬遜創辦人兼總裁貝索斯就頻頻因為負面新聞上新聞。繼上月被爆出軌宣布同老婆離婚後，佢噚日喺個人社交網站宣稱，被小報《Ｎａｔｉｏｎａｌ　Ｅｎｑｕｉｒｅｒ》母公司Ａｍｅｒｉｃａｎ　Ｍｅｄｉａ勒索，叫貝索斯唔好再追查《Ｎａｔｉｏｎａｌ　Ｅｎｑｕｉｒｅｒ》之前係點樣獲得佢嘅私人訊息，如果唔係就公開佢嘅私人照片。　　唔止佢被醜聞纏身，佢間公司都被大導演活地阿倫（Ｗｏｏｄｙ　Ａｌｌｅｎ）控告，指亞馬遜拒絕發行佢套新片《Ａ　Ｒａｉｎｙ　Ｄａｙ　ｉｎ　Ｎｅｗ　Ｙｏｒｋ》，連埋之前簽落另外四套新電影協議，合共被索償６８００萬美金，即５﹒３億港紙。　　入稟狀就指出，亞馬遜上年６月因為活地阿倫喺１９９２年同繼女單性醜聞，而宣布同佢解約。加上近年＃ＭｅＴｏｏ運動，令荷李活性醜聞相關嘅新聞事件再被人關注，有演員之後更拒絕再拍佢嘅新戲。但活地阿倫就反駁指，單嘢都過咗成廿五年，咁樣解約法係無任何理據。　　雖然單官司仲未開始打，不過若計埋日後離婚後被分走嘅身家，盈盈睇貝索斯豬年嘅財運似乎麻麻啦。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票