《笑傲缸湖》花旗國本《財富》雜誌經常出排行榜，相信缸友們都睇慣睇熟㗎啦∼財富今日又公布咗新一年嘅全球領袖排行榜。榜首無咩驚喜，由蓋茨基金會聯合創辦人Ｂｉｌｌ生同Ｂｉｌｌ太攞咗，佢哋由１９９５年到２０１７年，蓋茨同名嘅慈善基金已經部署４５５億美金，幫助發展中國家７億小朋友免受可預防疾病影響。　　《財富》引用「股神」巴菲特所講，蓋茨夫婦嘅影響力唔只係財富，而係兩個人一齊可以產生「乘數效應」（ｍｕｌｔｉｐｌｉｅｒ　ｅｆｆｅｃｔ），用唔同嘅風格向同一個「他屐」前進。　　年僅３８歲嘅新西蘭總理阿德恩就攞到「榜眼」，上個月基督城兩座清真寺發生咗嚴重嘅恐怖襲擊，５０人被殺，但佢引導新西蘭同穆斯林社區走出悲痛，盡顯領導應有嘅風範。　　獲得「探花」嘅可以話係侵侵（特朗普）嘅仇人，佢就係花旗國「通俄門」特別檢察官米勒。《財富》指米勒以尊嚴、正直，不惜犧牲自己嘅聲譽，都堅守法治，承擔「通俄門」調查吃力不討好嘅任務。無論「通俄門」下一步點發展，佢嘅貢獻都係對花旗國有利。　　失落三甲排第四嘅係馬化騰，即係ＱＱ（００７００）主席啊∼雜誌話相比其他喺科網界聲名大噪嘅領袖，佢比較低調，而ＱＱ旗下ＷＥＣＨＡＴ集收付款、訂嘢食、買飛、打機於一身，喺十億會員下影響力早就達到全球化。　　不過同科網界有關嘅上榜領袖又點止咁少，微軟現任行政總裁納德拉排第５，歐盟委員會競爭專員維斯塔格排第７，軟銀（ＳＯＦＴＢＡＮＫ）創辦人孫正義排第１２，最後點少得排第１４嘅蘋果公司行政總裁庫克。《任盈盈》

　　２０１９年十大全球領袖排行榜：

　　排名　　　　姓名　　　　　　　－－－－－－－－－－－－－－－－－－－－－－－－－－－－－－－－－－－－　　１　　　　　蓋茨夫婦　　　　　蓋茨基金會聯合創辦人　　２　　　　　阿德恩　　　　　　新西蘭總理　　３　　　　　米勒　　　　　　　「通俄門」特別檢察官　　４　　　　　馬化騰　　　　　　ＱＱ主席兼首席執行官　　５　　　　　納德拉　　　　　　微軟現任行政總裁　　６　　　　　桑伯格　　　　　　１５歲瑞典學生、氣候抗爭罷課行動推動者　　７　　　　　維斯塔格　　　　　歐盟委員會競爭專員　　８　　　　　安娜尼米里亞　　　南蘇丹獨立報Ｊｕｂａ　Ｍｏｎｉｔｏｒ總編輯　　９　　　　　安德列斯　　　　　世界中央廚房創辦人　　　１０　　　　麥克米隆、伍茲　　沃爾瑪行政總裁、高級總監　　－－－－－－－－－－－－－－－－－－－－－－－－－－－－－－－－－－－－

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情