《笑傲缸湖》今季英超爭標進入最後直路，缸友們有無心水呢？盈盈講開英超，除左睇靚仔球星之外，有一樣嘢盈盈其實都幾有興趣，就係英超球星人工有幾多啊！　　英超球星人工貴絕全球係人都知，最新數據話，上年成個英超聯賽嘅工資又漲一成半，至到２９億鎊，相當於２９０億港紙。咁大條數缸友可能都無咩概念，不如等盈盈幫大家計計，其實就大概等於煤氣（００００３）三年嘅盈利！　　德勤會計師行就話，今次工資再漲嘅原因，好大程度同球會要比更多轉會窗支出有關。喺２０１７╱１８年球季，所有英超球隊就有１９億鎊嘅支出，係歷年支出最高嘅一年，而比足球經紀嘅費用就達到２﹒６億鎊，比上年增加４９００萬鎊。其中紅軍（利物浦）係咁多球會之中比得最多，有近４３００萬鎊。　　既然英超球員人工係咁飆升，一定會有唔少缸友會相當好奇英超球隊嘅收入係咩情況，盈盈就搵到Ｄ資料，英超球會嘅收入主要嚟自電視轉播，現時英超嘅「六巨頭」，包括兵工廠（阿仙奴）、車路士、紅軍、紅魔（曼聯）、曼城同熱刺，而佢地亦同時係最受歡迎嘅球會，佔成個英超球賽嘅稅前收入達８９巴仙，亦即係話佢地六個每星期分別賺５３４０萬鎊，比上季成季４８４０萬鎊仲多！亦比聯賽其餘１４隊加埋只有４９００萬鎊為多！　　就咁睇情況似乎仍然樂觀，但當中有分析就話，其實嚟緊三年電視轉播嘅收入增幅只會微漲。而睇埋成盤數，其實上年成個英超球會稅前純利已經下跌１億，至到４億鎊。　　暫時盈盈就拎過公仔圖出嚟睇睇，十年圖就顯示英超嘅收入其實一直上升緊，由十年前嘅約１５億英鎊升到依加約４８億英磅，而工資就只係由約１０億鎊升到依加約２９億鎊，升幅嚟講都係以收入較大，十年升幅達２﹒２倍！好過恆指十年走勢啊！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇