《笑傲缸湖》話說近期花旗國個個都講緊隻Ｂｅｙｏｎｄ　Ｍｅａｔ（超越肉類），原來香江有部分舖頭都有得食，聽盈盈班中環人谷友話好似幾好味咁款，搞到個個呢排一收工就去叫個漢堡加杯啤酒，真係識嘆。　　個個貪口痕都去咬下塊「肉」，所以呢隻嘢係花旗國上市以嚟，股價都升到見唔到頂，以招股價２５蚊美金計算，噚日收市價係１６８﹒１蚊美金，足足升咗５﹒７倍，炒到癡晒線，而且近呢兩日重爆咗兩次裂口。華爾街班大孖沙個個睇好，大行報告有兩間畀「掃貨」，七間畀「揸貨」，無人睇淡咁款。　　呢邊個個一齊落鑊快炒，另一邊箱淡軍個個愁雲慘霧，生意失敗咁嘅款。玩開新股都知道，新屎坑點都會炒高一兩日然後散水，所以班淡軍見隻股日日創新高，就起勢出力沽，博佢總有一日大戶會出貨，點知﹒﹒﹒截至上個禮拜五（７日）為止，做呢隻股嘅淡軍已經輸咗３﹒９８億美金。　　聽聞損手爛腳嘅除咗大孖沙之外，重有喺外國專門玩開沽空嘅專家Ａｎｄｒｅｗ　Ｌｅｆｔ都要被迫輸錢，據分析指出，因為呢隻新股貨源太乾，同時又太過熱捧，根本就無下跌空間。加上可以被人拎嚟做沽空嘅股份少得可憐，淡軍被迫喺街外高位買貨平倉。Ａｎｄｒｅｗ向外界表示，股份上市無幾耐已經開始沽空，但去到９０蚊美金已經頂唔順平咗倉。　　佢個人認為，呢隻股嘅市值已經超過晒成個行業規模，加上遲下一定多競爭者，繼續炒上去係「愚蠢到極點」，認為合理股價係大概喺６５蚊美金。話雖如此，但間間大行都係咁唱好睇好，短期內可以向下炒真係好微囉，唔通好友可以繼續做長勝將軍？盈盈都唔執輸入場玩返兩手啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇