《笑傲缸湖》空中巴士（Ａｉｒｂｕｓ）近期又有搞作，話想搞個「未來機艙」，雖然話就話想多啲了解啲乘客，但其實係想透過飛機上乘客嘅數據，幫啲航空公司減低支出，不過今次仲話打算裝鏡頭喎，唔知大家驚唔驚私隱問題呢？　　作為花旗國波音嘅最大對手，空中巴士上個月開始測試一架有特別設計嘅Ａ３５０－９００鐵鳥，之所以特別係因為機艙入面布滿晒ｓｅｎｓｏｒｓ（感應器），收集晒機上所有嘅大數據。　　雖然設計好似有隱私問題，不過空中巴士坦白話，收集乘客嘅行為、消費數據，係為咗幫航空公司慳錢，又可以解決客人嘅不滿，例如廁所排隊嘅問題。　　電腦會記低機上洗手間開關嘅次數，機組人員就可以知道洗手間使用嘅頻率，令佢哋知道幾時可以重新添置廁紙同肥皂。　　空中巴士客艙營銷副總裁Ｉｎｇｏ　Ｗｕｇｇｅｔｚｅｒ認真咁話，呢個唔係一個概念，亦唔係一個夢想，而係一個可以幫佢哋知道，放幾多個廁所先係最好嘅方法。　　航空公司亦可以透過數據知道，邊啲座位傾斜咗需要維修，咁就唔使等到壞咗先嚟整。　　國際航空運輸協會曾經估計，２０１７年航空公司總共產生咗５７０萬公噸客艙廢物，去到２０２７年可能仲會增加一倍，而大數據可以畀機組人員知道需要幾多物資，唔會多亦唔會少，減少浪費。　　所有大數據最後都會透過機上ＷｉＦｉ系統，喺鐵鳥著陸之後送返去航空公司，仲可以同其他航班分享數據。　　雖然好處多多，但空中巴士仲打算裝小型鏡頭，話就話監控下幾多人等緊廁所或者浴室，但為咗解決隱私問題，空中巴士最後都係打算ｂｌｕｒ咗乘客個樣就算啦，唔知缸友又收唔收貨呢？　　不過，缸友又唔使太擔心，因為測試去到今年年尾先完，加上一眾航空公司都未開始試一試呢啲功能，同埋都唔知佢哋想唔想要呢啲功能，計劃最終可能有變！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情