《笑傲缸湖》花旗國總統侵侵（特朗普）可以話係史上最中意玩推特，最中意炫耀扮嘢嘅總統，每次佢一發推簡直就係全世界嘅焦點。更有人講笑話，侵侵發一個推就可以操控魚缸。而侵侵最近就成日話，多得佢嘅「促增長經濟政策」，而家花旗國失業少咗，工資漲咗，股市興旺，係佢帶咗「史上最強盛嘅經濟」畀花旗國咁話。但係事實又真係咁？　　根據花旗國最新嘅調查，唔少經濟學家普遍對企業利潤前景感到擔憂，其中最大嘅威脅就係侵侵引以為傲嘅政策。佢地就覺得，侵侵先係同神州打貿易戰，宜家戰火仲燒到去歐洲。１０月第一個星期，花旗國公布嘅各種經濟數據都不似預期，股市大跌。點睇都唔覺得同侵侵講嘅一樣呢。不過，唔緊要，歷史數據唔會講大話，用佢嚟作比較逐樣嚟睇。　　首先就講下ＧＤＰ啦，侵侵任職嗰陣ＧＤＰ第一季係３﹒１巴仙，但係第二季就倒退至２﹒１巴仙，但係２０１４年奧巴馬任職嗰陣第二季係有５﹒５巴仙，而且依個數字仲唔係花旗國史上最高。ＧＰＤ唔得，我地再嚟睇下侵侵最驕傲嘅股市。的確，道指喺侵侵任職嗰陣曾突破歷史高位，有支持者話係多得侵侵嘅政策，但係道指亦都因為佢周圍同人打貿易戰而產生劇烈嘅波動。　　侵侵仲曾經喺聯合國上面講，因為佢嘅政策，花旗國人「工資上漲，收入大增」，佢話３年嚟幫６００萬人搵到工作。２０１９年８月，花旗國嘅失業率係３﹒７巴仙，依個喺半個世紀前曾經出現過嘅數字，但係史上最低位其實係３﹒５巴仙。　　而工資方面，２０１８年，平均時薪確實係上升，但係延續了奧巴馬時代開始嘅上升趨勢。而且同一時間，花旗國喺存在通脹因素，家庭收入是在增加，但增速卻減慢。睇到依道，盈盈就覺得侵侵你都係唔好吹咁大，搞好你自己整出嚟嘅「蘇州屎」先啦。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情