《笑傲缸湖》花旗國嘅特斯拉電動車相信無人唔識啦，佢主席兼有「鋼鐵奇俠」之稱嘅馬斯克又同時係ＰａｙＰａｌ聯合創辦人，仲要開ＳｐａｃｅＸ撈埋太空探索技術，真係鬼咁把砲！　　雖然係咁，但佢最近惹咗麻煩嘢上身。唔知大家仲記唔記得上年喺泰國有一隊一行１３人嘅足球隊係泰國洞穴被困，最終有驚無險，全部人平平安安咁出翻哂嚟。唔講唔知，原來今次行動馬斯克搶哂風頭，佢嘅工程團隊用火箭嘅液氧罐做咗一個潛水救援倉，希望可以大派用場，開頭佢仲喺自己推特上賣廣告，好多人轉發同讚好添！但原來好鬼掃興，當時完成救援之後，一個泰國官員係ＦａｃｅＢｏｏｋ話任務完成，但原來馬斯克比嘅「禮物」被投閒置散無用過！　　馬斯克知道咗當然有Ｄ嬲豬啦，當時有幫手嘅米字國潛水員兼洞穴專家Ｖｅｒｎ　Ｕｎｓｗｏｒｔｈ仲要話佢喺度做「ｓｈｏｗ」，所以佢發哂老脾，話人地係「細路仔」、「戀童癖」，最後搞到自己惹哂官司上身。Ｖｅｒｎ　Ｕｎｓｗｏｒｔｈ仲大爆黑幕，話佢當時所搵要去幫手救援嘅私人偵探原來有重罪喺身！呢單仲未夠爆，原來佢之後仲曾經對泰國官員施壓，話佢工程團隊所設計出嚟嘅潛水救援倉有份參與救援添呀！　　睇嚟呢單案仲有大把花生食，但盈盈覺得馬斯克抽水還抽水，如果你有份參與嘅，抽吓水都無可厚非，但你地隻潛水救援倉由頭到尾都係擺喺度舖塵，證明人地真係用唔著呢樣嘢，又何必夾硬要人接受呢番好意呢，倒不如大方接受呢個事實，心胸廣闊啲做人都開心啲啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情