《笑傲缸湖》唔經唔覺一年一度頒發諾貝爾獎又到尾聲，今年經濟學獎係由三名研究全球貧窮嘅學者共同奪得，當中最引盈盈注目嘅係同老公班納吉一齊獲獎嘅杜芙若。經濟學獎項自１９６９年第一次頒發以嚟，獲獎人士嘅平均年齡為６７歲，只得一名女性。而杜芙若以４６歲之齡得獎，亦都係歷來第６對共同獲獎嘅夫婦，認真威水同夠晒浪漫呀！　　杜芙若獲獎後話，本身無諗過自己可以得獎，希望用自己嘅獎當係一個喇叭，喚醒大眾對貧窮問題嘅重視，繼續為解決貧窮同埋改善小朋友嘅學習機會而努力。佢又話，今次獲獎表明女性都可以成功同得到認可，希望激發其他婦女繼續工作，得到男性應有嘅尊重。聽完佢咁講，盈盈都有Ｄ眼濕濕添！姊妹們，加油呀！　　唔講唔知，佢哋嘅研究影響力有幾咁大，諾貝爾獎委員會話班納吉、杜芙若夫婦，以及花旗國發展經濟學家克雷默，３人嘅研究有助解決全球貧困問題，將消除全球貧困劃分為更精確以同埋較易管理嘅問題，仲讚揚佢哋嘅實驗方法係短短２０年間成為發展經濟學研究領域主流。原來佢哋嘅研究，早喺九十年代中期嘅實驗取得成效，改善非洲肯雅西部學校成績，並提高國際間嘅滅貧能力，亦為印度超過５００萬名兒童從學校嘅有效教育課中受益，仲令好多國家對預防性醫療提供巨額補貼。佢最後仲話，研究經濟唔係得宏觀經濟同埋財經，佢仲可以改變世界，等世界變得更美好！　　盈盈都要喺度，恭喜３位經濟學家，希望佢哋繼續研究造福人群啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情