《笑傲缸湖》人有七情六慾，有偏見都好正常，盈盈自己都唔敢話自己對所有人無偏見啦！但唔講唔知，原來ＡＩ（人工智能）都會出現偏見！　　花旗國公司Ｇｏｏｇｌｅ舊年推出咗叫ＢＥＲＴ嘅突破性新ＡＩ技術，目前已係Ｇｏｏｇｌｅ搜尋引擎用緊。佢可吸收大量數位化資訊，但竟然學咗人類嘅偏見！不論係幾十、幾百年定最新出現嘅，佢全部有樣學樣，同小朋友無分別。　　例如ＢＥＲＴ同埋類似系統都傾向將資訊同男性聯結，仲要往往輕視女性添！科學家仲對呢個新ＡＩ技術所犯嘅錯覺得好意外。　　電腦科學家孟洛（Ｒｏｂｅｒｔ　Ｍｕｎｒｏ）最近將１００個英文單詞打入ＢＥＲＴ嘅資料庫，其中包括「珠寶」、「寶寶」、「馬匹」、「房屋」、「金錢」、「行動」之類嘅名詞。結果顯示，ＢＥＲＴ將這些字詞同男性連結一齊嘅機率高達９９％，唯一例外就係「媽媽」（ｍｏｍ）。　　Ｇｏｏｇｌｅ發言人就話，公司已知到呢個問題，話會儘快解決。　　人類科技發展真係一日千里，但當中當然有好有壞，最緊要睇大家點善用啫！所以希望Ｇｏｏｇｌｅ快Ｄ整好呢個ｂｕｇ，唔係就攪到自己仲頭痕呀！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇