《笑傲缸湖》究竟網紅所產生嘅經濟效應可以有幾大呢？盈盈今日就見識到，原來網紅除咗影響我哋食買玩呢啲娛樂消費嘅選擇之外，仲有能力撼動魚缸，令神州一隻股票漲停板！　　件事係點嘅呢，要由一個人開始講起。話說喺神州有一個網紅，啫係開直播Ｐ到自己鬼五馬六然後做啲出位嘢靠人打賞果啲呢，名叫李佳琦。不過，佢有一個突出之處，就係好熟悉女性彩妝範疇，而且專攻唇膏，佢嘅直播多數以介紹、同賣唇膏為主，佢有句ｓｏｌｇａｎ係「Ｏｈ　Ｍｙ　Ｇｏｄ，買它！」就可以令好多女生情不自禁咁落單買佢推介嘅產品，最高紀錄係一分鐘之內賣出咗一萬四千支唇膏！前年９月，佢挑戰「３０秒塗口紅最多人數」健力士世界紀錄成功，於是就畀人封咗做「口紅一哥」啦。　　依家李佳琦喺抖音坐擁幾千萬ｆａｎｓ，成為咗美腕（上海）網絡科技旗下嘅藝人，代言嘅已經唔止係唇膏，連蟹同煎ｐａｎ都有賣，真係財源滾滾，有數據話佢上年總收入達到２億人仔，超越咗６成Ａ股上市企業嘅年利潤啦。　　咁犀利，唔怪得連上市公司都要痴埋去合作啦，噚日（１５日）一間喺深交所上市嘅影視製作、戶外廣告投放公司新文化（深：３００３３６）話，近日已經同美腕簽訂《戰略合作框架協議》，美腕可以接入新文化嘅戶外資源優勢，擴大李佳琦嘅線下曝光，新文化就通過同李佳琦嘅戰略合作，做線上媒體宣傳，形成全媒體整合營銷方案，一舉兩得咁喎。雖然咩細節都未落實，但新文化已經做咗「李佳琦概念股」，今日開盤即刻一字漲停，封單成２４０萬手呀！　　而深交所都出咗關注函，要新文化詳細講返係咪真係具備幫李佳琦提供客戶及整合營銷方案嘅能力，同對集團業務經營和財務業績嘅實際影響等等。不過，盈盈覺得，無論最後成唔成事都好，今次孖屐嘅反應確實令人驚訝，投資者真係相信網紅經濟可以有咁具大嘅實質作為？定係純粹跟風炒上？網紅經濟呢個概念，若然離開神州，放喺其他國家又可唔可行呢？呢啲細節，各位缸友或者可以再觀察多啲。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情