《笑傲缸湖》每個人都有唔同嘅童年回憶，盈盈都唔例外。盈盈就男仔頭啲，細個就超鍾意玩模型車，因為每一架玩具車，有唔同ＣＯＬＯＵＲＳ、線條設計、型號同牌子等等，真係會玩到停唔到手！唔知缸友有無同感呢？如果要數一個最出名整玩具車嘅品牌，就非日本嘅ＴＯＭＩＣＡ（多美卡）莫屬喇！　　唔講唔知，原來ＴＯＭＩＣＡ發售超過１０５０種車型，累計銷量已經超過６﹒７億輛。最近ＴＯＭＩＣＡ宣布，ＴＯＭＩＣＡ將會同豐田等車企合作，發售聯名ＴＯＭＩＣＡ玩具車。豐田、本田同日產嘅現役設計師，仲會為ＴＯＭＩＣＡ設計特別車款，由４月開始逐漸上市。　　你哋無睇錯呀！真車嘅設計師的而且確設計玩具車呀！呢個就係盈盈鍾意ＴＯＭＩＣＡ模型車嘅原因！佢啲車都係由設計真車嘅設計師包辦，果種真實程度係其他牌子無辦法比擬。　　適逢ＴＯＭＩＣＡ迎來發售玩具車５０周年，最近佢召開咗記者會，宣布會喺今年１０月舉辦粉絲感謝活動。嘩！越講越期待呀！唔知ＴＯＭＩＣＡ仲會唔會出啲聯乘車款呢？　　依家可能已經少咗小朋友玩呢款玩具車，好多都已經轉咗打機，例如ＭＡＲＩＯ咁囉！盈盈真係覺得好可惜架！盈盈始終覺得，玩呢啲可以揸上手嘅玩具車，比打機更加有「質感」同觀賞價值。真正嘅「愛車」之人，絕對唔可以唔收藏呢類型玩具車呀！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情