《笑傲缸湖》唔知大家鍾唔鍾意飲樽裝飲品呢？盈盈就鍾意飲無糖可樂，味道夠甜又唔怕肥呀嘛，不過每次都只會買罐裝，因為膠樽畀人感覺好唔環保，一諗起海入面嘅魚吞晒啲塑膠垃圾嘅畫面，就買唔落手啦。　　近排各國政商領袖齊集瑞士達沃斯出席世界經濟論壇，探討下環境風險、貧富差距咁啦，至於上年喺環保組織「Ｂｒｅａｋ　Ｆｒｅｅ　ｆｒｏｍ　Ｐｌａｓｔｉｃ」發表嘅統計入面被評為全球最大塑料污染公司嘅可口可樂，首席可持續發展官佩雷斯（Ｂｅａ　Ｐｅｒｅｚ）都有去㗎，仲接受咗ＢＢＣ採訪添，大家都係預佢講下啲減廢目標，公司好支持環保呢啲例牌嘢啦。點知，佢話買家渴求使用可以重新密封嘅輕質膠樽裝嘢飲，仲強調可口可樂無打算放棄即棄塑膠包裝咁喎。佢話：如果我哋唔可以遷就消費者，就無可能做到生意。　　哇，貴為每年生產３００萬噸塑膠包裝，啫係每分鐘２０萬樽嘅污染大公司。呢番說話好難唔被人理解為可口可樂想將所有責任推晒落消費者度個喎，盈盈作為消費者，唔開心囉。佩雷斯都有補飛㗎，話認同要盡量提前達到公司嘅２０３０年目標，啫係膠樽嘅回收量同生產量要一致，同埋喺制造塑膠包裝果陣要混入五成嘅回收塑膠。　　不過，原來呢啲目標都唔可以完全消除塑膠垃圾，環保組織Ｃｏｎｔａｉｎｅｒ　Ｒｅｃｙｃｌｉｎｇ　Ｉｎｓｔｉｔｕｔｅ話，每年有成２２０億個膠瓶被扔掉，而每日有超過６０００萬個會去咗垃圾推填區。仲有大部分會落咗海。有調查話，去到２０５０年喺海入面嘅膠會多過魚，真係太恐怖啦。　　盈盈覺得，可口可樂可以參考下ｓｔａｒｂｕｃｋｓ（星巴克）同雀巢嘅做法，前者計劃喺今年底之前完全淘汰膠飲管，到２０３０年將所有廢物嘅生產減少一半；後者就承諾到２０２５年使用全數可回收包裝，相關資料我哋好容易喺唔同媒體搵到。如果可口可樂嘅環保工作真係有進展，都不妨多啲同市民講，相信大家聽到都會好開心快樂。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情