《笑傲缸湖》盈盈噚日先同大家講過，花旗國總統侵侵因為喺Ｔｗｉｔｔｅｒ嘅ｐｏｓｔ入面，攻擊加州民主黨籍嘅州長郵寄投票會令選舉出現舞弊，而被Ｔｗｉｔｔｅｒ點出嚟提醒讀者要查證事實，即係間接話佢發放ｆａｋｅ　ｎｅｗｓ，侵侵梗係嬲嬲豬啦。白宮發言人最新就話，侵侵會簽署內容有關社交平台嘅行政命令，各界人士隨即發聲話佢無權限制社交媒體。究竟大家鍾意一個會叫你ｆａｃｔ　ｃｈｅｃｋ嘅社交平台，定係鍾意簽署行政命令打壓言論自由嘅總統多啲呢？盈盈真係好想知答案！　　大家首先睇睇法律界人士嘅意見。第一修正案律師同刑事辯護律師Ｋｅｎ　Ｗｈｉｔｅ就話，侵侵只係向緊佢嘅選民釋出空洞嘅道德信號，顯示自己企喺道義一方，佢認為政府其實無權關閉社交媒體，因為入面嘅內容同時具有法定同第一修正案的權利，可以酌情進行審議同發表評論。而有大學法學教授覺得，侵侵好明顯想蝦Ｔｗｉｔｔｅｒ，令佢可以繼續散布佢想發放嘅消息，無論佢哋係真定假，侵侵都完全唔使受到懲罰。似乎法律界真係好不滿咁喎。　　同行如敵國，另一面睇就係同氣連枝。Ｔｗｉｔｔｅｒ主要競爭對手Ｆａｃｅｂｏｏｋ行政總裁朱克伯格出聲，佢接受外媒採訪果陣話，需要了解政府真正想要做啲咩，但暫時嚟睇，政府因為擔心審查制度而選擇審查一個平台，並唔係恰當嘅反應。　　雖然依家Ｔｗｉｔｔｅｒ同Ｇｏｏｇｌｅ官方未有回應，但諗下都知唔會歡迎侵侵嘅決定啦！盈盈知道侵侵善於製造敵人，再靠打擊佢哋提高自己聲望，就係因為咁，佢先可以喺政商界獲得成功。不過，盈盈覺得呢個方式只適用於對外，例如以往嘅北韓，針對花旗國本土嘅社交媒體對佢並無好處，仲可能會打擊民望，不利總統選情，所以倒不如花多啲時間諗下點樣刺激經濟好過啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情